Kongamano hilo litawakutanisha wafanyabiashara wa Tanzania na wenzao wa Dubai kujadili fursa za biashara na uwekezaji na kutafuta masoko ya bidhaa na huduma za Tanzania.
Waziri wa Viwanda na Biashara, Judith Kapinga, anatarajiwa kuwa mgeni rasmi katika kongamano la biashara na hafla ya utoaji wa tuzo za Consumer Choice Awards 2026 jijini Dubai, Falme za Kiarabu (UAE). Hayo yameelezwa na Mkurugenzi Mkuu wa Mamlaka ya Maendeleo ya Biashara Tanzania (TanTrade), Ephraim Balozi Mafuru, akizungumzia maandalizi ya hafla hizo.
TanTrade inaandaa kongamano hilo kwa kushirikiana na Shirikisho la Sekta Binafsi Tanzania (TPSF) na Consumer Choice Awards Africa. Kwa wazalishaji wa Tanzania, ni nafasi ya kukutana moja kwa moja na wafanyabiashara wa Dubai, kutafuta washirika na kujadili namna ya kufikisha bidhaa zao kwa wanunuzi wa UAE.
Kwa mujibu wa Mafuru, UAE inashika nafasi ya pili kati ya nchi 10 zinazonunua zaidi bidhaa kutoka Tanzania. Alisema kuwa mwaka uliopita, UAE ilinunua bidhaa za Tanzania zenye thamani ya zaidi ya dola za Marekani bilioni 1.324.
Mafuru aliongeza kuwa ushiriki wa Waziri Kapinga utasaidia kuimarisha mazungumzo na wafanyabiashara na wadau wa soko la Dubai kuhusu namna ya kuongeza mauzo ya bidhaa za Tanzania na kukuza biashara kati ya nchi hizo mbili.
